عـبـدالـمـجـیـد ایـشـچـی: تـورکــمـن خـلـقـی نـیـنـگ صـادق اوغـلانـی

 تورکمن خلقیدن دوستلریم کوپ، اولرآره سیده حیاتدن کوز یومگن اوچ کیشی اوزیگه خاص خصوصیتلری بیلن اجره لیب توررد عبدالقادر سونمز دپلومات و حقوقدان، گیلدی خان دولت اربابی و اجتماعی شخصیت، عبدالمجید ایشچی شاعر و انقلابی کورشچن ایدی

سونمز حقوق و اقتصاد فاکولته سینی بیترگندن کیین، ولسوال و بیرمتدن کیین ایچکی ایشلر وزیرلیگیده آرشیف مدیری صفتیده ایشله دی. اوشنده مین «کابل رادیوسی» پروگراملر مدیری ایدیم. خیرخانه ده اوییمیز یقین بولگنی اوچون تیز تیز اوچره شیب تورردیک. او حقوق فنینی یخشی بیلردی، بعضا شعرهم یازردی.

سونمز تورکیه گه باریب سفریگه دوام بیردی. تورکیه نینگ ایریم سیاسی شخصیتلری جمله دن جلال بایار سابق جمهور رئیس بیلن اوچره شردی. 1978 ییل اپریل اوزگریشیدن کیین مینینگ تشبثیم بیلن تورکیه ده افغانستان دموکراتیک جمهوریتی نینگ بویوک ایلچیسی قیلیب تعیینلندی. ایککی اولکه مناسباتینی کینگیتیریش اوچون فعالیت آلیب بارردی. بیر مرته هم کابلگه کیلیب کیتدی، او بیلن بو سونگگی اوچره شیمیزایدی. افسوس که بو استعدادلی دپلومات کوپ اوتمی بیر ترافیک حادثه سیده حیاتدن کوز یومدی. روحی تینچ بولسین!

گیلدی خان، تورکمن خلقی نینگ کوزگه کورینگن ضیالی شخصیتلریدن بیری ایدی. او کوپ ییللر معارف ساحه سیده خدمت قیلیب، ینگی نسل تربیه سیگه اعتبار قرتدی. پارلمانده خلق وکیلی بولیب ایشله دی. تاریخ و ادبیات، اینیقسه، تورکی خلقلر تیل و ادبیاتیگه کوپ قیزیقردی و بو ساحه ده کینگ معلوماتگه ایگه ایدی.

یقین و صمیمی دوست ایدیک، کابل دریاسی بوییده گی اپارتمانده بیر اتاقده یشردی. کوپ اوچره شردیک. مینده تورک مشهور عالمی اسماعیل حقی تورک تیلیگه اوگیرگن قرآن نینگ ایکی جلدلیک تورکچه ترحمه سی بار ایدی. اتاتورک زمانیده عرب یازوویده نشر بولگن بو «تورکی قران»نی گیلدی خان کوپ یاقتیرردی. آخری اونینگ التماسیگه کوره بو کتابنی اونگه ساوغه بیردیم.

ثور اوزگریشیدن کیین او مینینگ تکلیفیم بیلن جوزجان والیسی ایتیب تعیینلندی. تقریبا بیرییلگه چه موفقیت بیلن ایش آلیب باردی. لیکن امین تشبثی بیلن باشقه بیر کیشی ولایت حاکمی ایتیب یوباریلدی. توغریسی اونی حمایه قیلیشگه مینینگ کوچیم ییتمدی. اونینگ روحی شاد بولسین!

اما علمی درجه سی پوهنمل و نظامی رتبه سی تورن جنراللیک درجه سیگه ییتیب بارگن شاعر، یازووچی و عدالت یولی کورشچیسی عبدالمجید ایشچی تورکمن خقی نینگ بیر صادق اوغلانی صفتیده اوزیدن کوپ اثرلر قالدیردی.

عبدالکریم اوغلی عبدالمجید کوندوز ولایتی نینگ قلعه زال ولسواللیگی آق تیپه قیشلاغیده بیر دهقان عایله سیده توغیلیب اولغیدی. باشلانغیچ و اورته تعلیمنی قلعه زال و خلم مکتبلریده توگتگندن کیین 1351 ییل بلخ اساسی دارالمعلمینینی توگتیب 1357 ییلگه چه بدخشان، تخار، کوندوز و غزنی ولایتلریده اوقیتووچی بولیب خدمت قیلدی. بیر مدت تخار و بامیان ده تعلیم و تربیه عمومی مدیری صفتیده ایشلگندن کیین عالی تحصیل اوچون شوروی گه یوباریلدی و داخله اردو رشته سیده دپلوم آلیب وطنگه قیتیب ، ایچکی ایشلر وزیرلیگی مرکزی قطعه لریده وظیفه بجردی.

ایشچی 1366دن 1373 گه چه امنیت آمری و جوزجان ولایتی امنیه قومندانی صفتیده ایشله دی. کابلده مرکزی دولت توگه گندن کیین شمالده ملی اسلامی جنبشی عالی شوراسی نینگ دعوت و تنظیم بولیمی رئیسی و 1375 ییل تورکمنستانده جنبش نینگ نماینده سی بولیب ایشله دی.

جنرال ایشچی عشق آباد شهریده بولیب اوتگن جهان تورکمنلری خلق ارا تشکیلاتی نینگ بیرینجی، ایککنچی و بیشینچی قورولتایلریگه اشتراک ایتیب، اوشبو تشکیلات نینگ تیل و ادبیات کمیسیونی اعضاسی ایدی. او باشقه وظیفه لر قتاریده بلخ اسلامی نظامی اونیویرستیتیده هم تدریس قیلردی.

ایشچی 1348 ییلدن تورکمن تیلیده شعر یازیشگه باشله گن. شعر و مقاله لری افغانستان و تورکمنستان مطبوعاتیده نشر بولیب کیلگن. 1375ییل تورکمنستان ملی انستیتوتی تاماندن نشر ایتیلگن «سالار بابا تاریخی» نینگ بیرینچی جلدی، ایشچی نینگ گروپی ایش محصولی ایدی.

وطن طالبان قولیگه اوتگندن کیین ایشچی بیش ییلگه چه ایران اولکه سیده غربتده حیات کیچیریب، تورکمن و فارس تیللریده یازگن اثرلرینی نشر گه تاپشیردی. او 1381 ییل وطنگه قیتیب کیلدی. لیکن اجل اونگه ایجادی ایشلرنی دوام بیریش اوچون مهلت بیرمه دی.

ایشچی نینگ وفاتی بیلن تورکمن خلقی بیر صادق و ایل سیور اوغلانینی قولدن بیردی و تورکمن تیل و ادبیاتیده اونینگ اورنی بوش قالدی. مجید ایشچی نینگ ادبی، ایجادی ایشلرینی دوام بیریب کیله یاتگن اونینگ استعدادلی قیزی قمر رویا ایشچی ایتیشیچه ایشچی نینگ اثرلریدن 6 جلد ایرانده چاپدن چیققن و باشقه اثرلری قول تیگیلمسدن اوز حالیده تورگن.

ایشچی نینگ روحی تینچ و جایی جنتده بولسین!

منبع: استاد شرعی جوزجانی